பிரதேச செயலகம் - ஹாரிஸ்பத்துவ

ஹாரிஸ்பத்துவ பிரதேச செயலகம்

புவியியல் அமைப்பு

வரலாற்று சிறப்புமிக்க மத்திய மலைநாட்டில், கண்டி மாவட்டத்தின் மேற்கு மற்றும் வடமேற்குப் பகுதியில் அமைந்துள்ள ஹாரிஸ்பத்துவ பிரதேச செயலகப் பிரிவு, மாவட்டத்தின் மிகப்பெரிய பிரதேச செயலகப் பிரிவுகளில் ஒன்றாகக் கருதப்படுகிறது. வடக்கில் பூஜாபிட்டிய, வடகிழக்கில் பிகாஓய, தென்கிழக்கில் கங்கவட்ட, தென்மேற்கில் யடிநுவர மற்றும் வடமேற்கில் ஹதரலியத்த ஆகிய செயலகப் பிரிவுகளுடன் எல்லை பகிர்ந்து கொள்ளுகிறது. இதன் மொத்த பரப்பளவு சதுர கிலோமீட்டர் 59.04 ஆகும்.

ஹாரிஸ்பத்துவ பிரதேசம் பொதுவாக மிதமான மேடுபாங்கான நிலப்பரப்பைக் கொண்டுள்ளது. சில இடங்களில் சிறிய மலைச்சரிவுகளும் காணப்படுகின்றன. வருடம் முழுவதும் தென்மேற்கு மற்றும் இடைமழை பருவங்களில் மழை கிடைக்கிறது.  இங்கு பல கிளைநீர் ஓடைகள் காணப்படுகின்றன. இந்த ஓடைகள் சிறிய பள்ளத்தாக்குகளின் வழியாக  பாய்ந்து மகாவலி ஆற்றுடன் சங்கமிக்கிறது. இங்கு பலவகையான மண் வகைகள் காணப்படுகின்றன. அதில் பெரும்பாலும் காணப்படுவது சிவப்பு-பழுப்பு லேட்டரைட் மண் ஆகும். மொத்தத்தில் வளமான மண் நிலப்பரப்பு காணப்படுவதால் சிறிய ஏற்றுமதி பயிர்களுக்கு ஏற்றதாகும். மண்ணில் எப்போதும் ஈரப்பதம் நிலைத்திருப்பதால் செடிகள் நன்றாக வளரக்கூடிய சூழல் உள்ளது.

இங்கு 84 கிராம சேவகர் பிரிவுகள் உள்ளன. மொத்த மக்கள் தொகை 101,739 ஆகும். இதில் பெண்கள் 52,624 பேர்; ஆண்கள் 49,115 பேர். பெரும்பாலும் சிங்களர்கள் வாழ்கின்றனர். தவிர, தமிழர், முஸ்லிம், பர்கர் சமூகத்தவர்களும் வசிக்கின்றனர். பிரதான பொருளாதார நடவடிக்கை வேளாண்மை ஆகும். கண்டி மற்றும் கடுகஸ்தொட்ட நகரங்களுக்கு அருகில் இருப்பதும், கண்டி–குருணாகல் பிரதான சாலை இப்பகுதியைக் கடந்து செல்லுவதும் காரணமாக, ஹாரிஸ்பத்துவ பகுதி அரைநகர்ப்புற தன்மையைப் பெற்றுள்ளது. முக்கிய வாணிகப் பயிர்களாக கிராம்பு, ஜாதிக்காய், மிளகு மற்றும் பல சிறிய ஏற்றுமதி பயிர்கள் பயிரிடப்படுகின்றன. குறிப்பிடத்தக்க தொழிற்துறை நடவடிக்கைகள் இங்கு இல்லை. ஆகையால் இப்பகுதி இயற்கை அழகும், மிதமான காலநிலையும், பலவிதமான வளங்களும் கொண்ட, கிராமிய மக்களால் நிரம்பிய பகுதி ஆகும்.

வரலாற்று தகவல்கள்

மத்திய மாகாணம், கண்டி மாவட்டத்தில் அமைந்துள்ள ஹாரிஸ்பத்துவ என்ற நிலப்பகுதியின் வரலாறு, அனுராதபுர காலம் வரை சென்றடைவதாக வரலாற்றுத் தகவல்கள் காட்டுகின்றன. “பாளி போதி வம்ச கெடபத விவரண” என்ற நூலில் வரும் துமிந்தாகமன கதைப்பகுதியில், தேவுகோத் குமாரருக்கு இரண்டாவது பைத்திஸ் நிரிதுன் வழங்கிய லக் மஹரட்டி என்ற பதவியுடன் சேர்த்து சதுசிரிய பூமியை (சதரசி நிலப்பரப்பு) வழங்கியதாகக் குறிப்பிடப்பட்டுள்ளது. அதன்படி இப்பகுதிக்கு ஹாரிஸ்பத்துவ என்ற பெயர் கிடைத்ததாகக் கூறப்படுகிறது.

மேலும் ஹாரிஸ்பத்துவ வரலாற்றை வெளிப்படுத்தும் முக்கிய தலமாக கடாரங்கல விகாரை குறிப்பிடப்படுகிறது. இவ்விகாரை அனுராதபுர காலத்தில் அல்லது பொலன்னறுவ காலத்தில் தோற்றமுற்றதாக நம்பப்படுகிறது. சில நூல்களில் இது வலகம்பா மன்னனால் ஆரம்பிக்கப்பட்டதாகக் குறிப்பிடப்படுகிறது. சோழர்களிடமிருந்து தப்பிய ஓடிய மன்னன், ஒரு காலத்தில் இங்கு ஒளிந்திருந்ததாகவும் குறிப்பிடப்பட்டுள்ளது. இவ்விகாரையில் சுமார் 80 இராத்தல் எடையுள்ள பொற்சிலை உள்ளது. இந்த சிலையின் வரலாறு புத்தகாலம் வரை செல்கிறது. இந்தியாவில் தயாரிக்கப்பட்ட இந்த சிலை, புத்தர் பரிநிர்வாணம் அடைந்தபோது புத்தரின் உடல் சாம்பலை வைக்கப் பயன்படுத்தப்பட்ட பொன்னால் தயாரிக்கப்பட்ட நான்கு சிலைகளில் ஒன்றாகும். அவற்றில் ஒன்றை மலியதேவ பிக்கு இலங்கைக்கு கொண்டு வந்ததாக நம்பப்படுகிறது. அக்காலத்தில் இந்தச் சிலை பாதுகாப்பிற்காக கடாரங்கல ராஜ மஹா விகாரையில் வைக்கப்பட்டதாகவும் புராணங்கள் கூறுகின்றன.

ஆங்கிலேய ஆட்சிக் காலத்தில் ஹாரிஸ்பத்துவ பல நிர்வாகப் பகுதிகளாகப் பிரிக்கப்பட்டதாக குறிப்பிடப்பட்டுள்ளது. அவை:

• குலுகம்மன சியபத்துவ
• மத்திய சியபத்துவ
• கல சியபத்துவ
• உடகம்பஹ
• பல்லேகம்பஹ

மேலும், பழமையில் ஹாரிஸ்பத்துவ “பலவிட்ட” என்ற பெயராலும் அழைக்கப்பட்டதாக புராணங்களில் சொல்லப்படுகிறது. அதாவது, வீரர்களால் நிரம்பிய பகுதி என்று அர்த்தம். இதனால், ஹாரிஸ்பத்துவ பகுதி கலைஞர்களால் மட்டுமல்ல, வீரர்களாலும் நிரம்பியிருந்த பகுதி என்பதும் தெளிவாகிறது.

1992 முதல் பணியாற்றிய பிரதேச செயலாளர்கள்